Grosser Bruder

Mein erster Beitrag in diesem Jahr, erzählt die Ereignisse rund um die Ankunft von Söhnchen Nr.2 – aus Sicht meines Erstgeborenen.👦🏻 Ich habe rückwirkend versucht, mich in seine (Gefühls-) Lage hineinzuversetzen, um ihn besser verstehen zu können und ihm so die neue und schwierige Situation vielleicht etwas zu erleichtern… Irgendwie fand ich es passender, diesen Text in Mundart zu verfassen☺️ Viel Freude beim Lesen und allen noch einen entspannten und friedlichen Neujahrstag✌🏼

Sit eme Ziitli, fallt mir uf, dass mis Mami immer dicker wird… Vorallem ihre Buuch isch uf eimal so gross worde. Sie und dä Papi redet ständig vomene Baby, ich weiss aber eigentlich gar nöd so genau, was sie dämit meined. Ich glaub aber, es isch öpis guets, will ihri Auge jedesmal strahled, wänn sie drüber redet. Ich muess mis Mami immer ahluege, bsunders ihre gross Buch isch so interessant. Ich dörf au immer anelange, wänn ich will. Dänn hät s’Mami amig uh Freud und seit wieder „Baby“. Das wär doch au es super ersts Wort, mit däm ich mini Elterä chönt überrasche!? Hüt Namittag spieled mis Mami und ich euses Lieblingsspiel; Wösch zämeleggä. Ich lieb das Spieli und mir händs immer uh lustig mitenand. Mängmal schubs ich dä frisch zämegleiti Kleider-Stapel um – es gseht so toll us, wänn all die Chleider wie en Fächer uf gönd😝 s’Mami packt mich dänn amig und chüzelet mich und seit „Neeeeeei Schaaaatz, jetzt müemer alles wieder zämäleggä…“ und dänn muess ich immer lache. Ich liebs, wänn s’Mami das macht! Ich find, jetzt isch genau dä richtig Moment cho und ich säge zum Mami „Baby!“. Ooooh wie hät s’Mami Freud, ich glaub, sie hät sogar Träne i dä Auge!! Sie knuddled und küsst mich und seit „Bravooooo Schatz, dis erstä richtige Wort! Das häsch du so schön gseit“ – ich bin meeeeega stolz! Mis erstä Wort! Jetzt bin ich sicher; Baby bedüted öpis guets und ich säges ab jetzt bi jedere Glägeheit.

Nacheme Wiili isch dä Buch vom Mami so gross, dass ich sie gar nüme gsehn, wänn ich vor ihre stahn… Ich will dänn ufglupft wärde, damit ich ihres Gsicht wieder gsehn aber s’Mami seit i letschter Ziit immer öfter: „nei min Schatz, jetzt mag s’Mami nöd… Chum, mir sitzed zäme ufs Sofa…!“ Komisch, so känn ich das gar nöd vo ihre… Stimmt ächt öpis nöd…? Früehner hät sie mich au immer d’Stäge abetreit und hät „Flugi-Grüsch“ däzue gmacht. Aber sit dä Buch sooo gross isch, muess ich sälber Stäge laufe. Hät sie das dänn nöd au so lustig gfunde wie ich…?

Ich gspühre, wie mini Eltere langsam unruhiger wärded… Ui, was macht sie so nervös? Das verunsicheret mich und ich will jetzt erst rächt ganz viel uf dä Arm gno wärde und bsunders viel Ziit mit em Mami verbringe. Vorallem ihschlafe fallt mir wäg däm uh schwär. Ich ha so viel Frage wo ich mim Mami und mim Papi gärn würd stellä aber ich chan ja gar nanig rächt schwätze😔 Drum drähed sich Gedanke i mim Chopf und ich wird eifach nöd müed… Zum Glück dörf ich mich jedä Abig ganz nöch a s’Mami kuschle und Sicherheit uftanke. Aber irgendwie isch immer dä grossi Buch im Wäg🙄 Es fühlt sich eifach alles so anderst ah, als ich mir das gwöhnt bin… Hmmm… Hauptsach, ich gspühre, dass sie mich no ganz fescht liebed.💞

Dänn, amene Namittag isch alles ganz komisch… Dä Papi chunt früehner hei – ich han nonig emal min Zvieri gässe. Und s’Mami isch i dä Badwanne am Pause mache. Ich will jetzt au id Badwanne und mit ihre echli plantsche, yeeaah!💦 Aber dä Papi nimmt mich wäg und seit: „Schatz, du muesch s’Mami jetzt in Rueh lah.“ Ich wird truurig. Wieso dörf ich jetzt nöd au bade?? Normalerwiis nimmt mich s’Mami immer mit und mir mached ganz viel Seich, das isch immer sooo lustig… Da lüütets plötzlich a dä Türe und mis Nani und dä Opa sind da! Juhuuuiiii, ich han gar nöd gwüsst, dass sie mich hüt chömed go bsueche!? Sooo cool!! Mini Träne vo vorher sind scho wieder vergässe. Churz druf abe git mir dä Papi en dicke Kuss und seit zu mir, ich söll ahständig bliebä. Mis Mami han ich gar nüm gseh – hmmm, sie chunt bestimmt grad wieder und überhaupt, s’Nani isch sowieso grad viel interessanter😜 Mir spieled ganz viel, lueged mini Lieblingsbüechli ah und gönd zäme uf dä Spielplatz. S’Nani choched sogar extra ihres Spezial-Znacht wo ich so gärn han. Irgendwänn wird ich dänn langsam müed vo däm ufregende Tag… Aber mis Mami isch leider nonig zrugcho. Und wo isch dä Papi? Ich chan doch gar nöd ihschlafe ohni mis Mami! Ufeimal gaht d’Ziit gaaanz langsam ume und ich mag chum no mini Auge offe bhalte… S’Nani hät mich scho es paar mal welä is Bett tue, aber ich will nöd schlafe, bevor nöd mis Mami wieder da isch – oder dä Papi. Dänn ENDLICH, chunt dä Papi wieder hei! Aah, bin ich froh… Ich frög nöd emal me nach em Mami, sondern ghei grad in Tüfschlaf, nachdem mich dä Papi is Bett bracht hät… 

Am nächste Morge – ich han usnahmswiis emal echli länger gschlafe als suscht – hät mir dä Papi dänn erklärt, dass mir hüt s’Mami gönd go bsueche und: S‘BABY!! Oooohh, wooow so cool ich freu mich wie verruckt!!! Endlich erfahr ich, wer oder was das isch, juhui! Ich dörf mini Lieblingshose ahzieh und ich dörf im Auto sogar vorne bim Papi sitze, natürlich i mim bequeme, neue Chindersitz. Ich gseh, dass mis alte Sitzli immer no uf dä Rückbank vom Auto staht. Komisch, däbii bruch ich das ja gar nüme!?🤔

Dänn chömed mir im Spital ah und ich chas chum erwarte, endlich mis Mami wieder zgseh. Ich ha sie no nie sooo lang nöd gseh und ha sie scho ganz fescht vermisst. Bestimmt dörf ich grad zu ihre uf dä Arm springe und sie schwingt mich dur d’Luft, wie sie das immer macht, wänn ich sie länger nüme gseh han… Ich mach e grossi Türe uf und da liit mis Mami im Bett. Oooh, sie gseht aber müed us… Und halt! Was hät sie da ufem Arm?? Wo isch dä Buch? Was isch mit däm passiert?? Ich chlättere zu ihre uf s‘Bett und da gsehn ich’s; da liit es chliises, verknautschts, rots Mänschli. Mis Mami freut sich sooo sehr, mich z’gseh, druckt mich so guet sie chan und seit mit vertrauter Stimm: „Lueg min Schatz, jetzt isch es ändlich da… Das isch s’BABY! Du häsch es BRÜEDERLI übercho. So lang hämer müesse warte, hmm?! Wotsch ihm es Küssli gäh?“. Jaaaaa! Klar will ich!! Also DAS isch i dem Fall es Baby..!? Mmmh, das schmöckt dänn fein! Und es isch gaaanz fiin und weich, fascht wie mini Stofftierli🧸😍 Ob ich’s dänn ächt au dörf zu mir is Bett näh am Abig…?! Die Vorstellig macht mich so glücklich, dass ich ahfange gumpe und klatsche und quitschä! S’Mami und dä Papi müend lache und freued sich au mit mir. Aaw wie lässig, ich han endlich en chline Brüeder, es neus Spielzüg, für mich ganz allei. ES BABY ISCH WÜRKLICH S‘TOLLSCHTE UND BESCHTÄ UF DÄ GAAANZE WÄLT😍😍😍

…dass der kleine Bruder nicht immer nur Freude bereitet, sondern zum grössten Kontrahenten heranwächst, das musste leider auch MEIN Primo auf schmerzhafte Weise erfahren. Über die Entthronung mit all ihren Facetten, möchte ich euch in einem separaten Beitrag berichten.

Eure Rebekka